Միջազգային Amnesty International իրավապաշտպան կազմակերպությունը հրապարակել է Լեռնային Ղարաբաղի (Արցախի) վերջին պատերազմին, ավելի ստույգ՝ հրթիռային հարվածների արդյունքում զոհված խաղաղ բնակիչներին վերաբերող զեկույց:
Ճակատի երկու կողմում աշխատող փորձագետների եզրակացությունները սպասելի էին. «ռազմի օրենքներն ու սովորույթները» խախտել են ե՛ւ ադրբեջանական, ե՛ւ հայկական ուժերը, թեեւ երկու կողմն էլ մեղքը չի ընդունում։
Amnesty International-ի երկարաշունչ վերնագրով զեկույցում վերլուծություն է արվել միմյանց ուղղությամբ արձակված 17 հրետանային եւ հրթիռային հարվածների ու դրանց արդյունքում խաղաղ բնակչության շրջանում եղած զոհերի վերաբերյալ. 44 օրվա ընթացքում երկու կողմից զոհվել է 146 մարդ, այդ թվում երեխաներ եւ ծերեր:
Զեկույցի առաջին մասում խոսվում է ադրբեջանական կողմի՝ ավելի ստույգ՝ Գյանջա եւ Բարդա քաղաքների, ինչպես նաեւ Գաշաթլի գյուղի զոհերի մասին:
Զեկույցի երկրորդ մասում նշվում է, որ հայ բնակչության դեմ, մասնավորապես՝ Ստեփանակերտի ուղղությամբ ադրբեջանական ուժերը կիրառել են կասետային ռումբեր:
«Ադրբեջանի իշխանությունները պետք է լիովին գիտակցեին, որ հոկտեմբերի 4-ին Ստեփանակերտին հասցված բազմաթիվ հրթիռային հարվածները՝ «Գրադ» տեսակի հրետանու եւ միջազգայնորեն արգելված կասետային ռազմամթերքի կիրառմամբ, հիմնահատակ կավերեն բնակելի շենք-շինություններն ու զգալի վնաս կհասցնեն խաղաղ բնակչությանը: Նման գրոհները խախտում են միջազգային մարդասիրական իրավունքի սկզբունքները»: