Կանադայի եւ Ավստրալիայի նոր պատժամիջոցները Ռուսաստանի դեմ

Ըստ ռուսական «ՏԱՍՍ» գործակալության՝ Կանադայի ԱԳՆ-ն հայտարարոել է, որ կառավարությունը հակառուսական նոր պատժամիջոցներ է սահմանել Ղրիմը Ռուսաստանի Դաշնության կազմին միացնելու դեմ։

Կանադայի արտգործնախարար Մարկ Գարնոն հայտնել է երկու անձանց եւ չորս սուբյեկտի նկատմամբ նոր պատժամիջոցների մասին՝ համաձայն Ռուսաստանի եւ Ուկրաինայի հատուկ տնտեսական միջոցառումների կանոնակարգերի։

Սեւ ցուցակում են հայտնվել  Grand Service Express-ի գլխավոր տնօրեն՝ Ալեքսանդր Գանովը,  Mostottrest-ի գլխավոր տնօրեն Լեոնիդ Ռիժենկինը, ինչպես նաեւ Բերկակիթ-Թոմմոտ-Յակուտսկ երկաթուղային գծի շինարարության տնօրինությունը, Ղրիմի երկաթուղային դաշնային պետական միացյալ ձեռնարկությունը եւ Առաջին ղրիմյան ապահովագրական ընկերությունը։

Այսօր էլ Ավստրալիայի արտգործնախարար Մարիս Փեյնն է հայտարարություն տարածել, ըստ որի՝ Ավստրալիան նպատակաուղղված ֆինանսական պատժամիջոցներ եւ ճանապարհորդական արգելքներ է սահմանել մեկ անհատի եւ ռուսական չորս ընկերությունների դեմ, որոնք կապված են Կերչի նեղուցի երկաթուղային կամրջի կառուցման եւ շահագործման հետ։

Նախարարի խոսքով՝ սահմանափակումների մասին որոշումն ընդունվել է Կանադայի հետ համաձայնեցված եւ Միացյալ Թագավորության ու Եվրամիության կողմից ձեռնարկված գործողություններին զուգահեռ: