ՀՀ արտգործնախարար Արարատ Միրզոյանն ընդունել է Կարմիր խաչի միջազգային կոմիտեի (ԿԽՄԿ) փոխնախագահ Ժիլ Կարբոնյեի գլխավորած պատվիրակությանը։
Հանդիպման ընթացքում Միրզոյանը շեշտել է, որ Ադրբեջանը շարունակում է արհեստական խոչընդոտներ ստեղծել գերիների վերադարձի հարցում եւ, չնայած հայկական կողմի ներկայացրած ապացույցներին, թաքցնում է գերիների իրական թիվն ու պահման վայրերը, ինչը բռնի անհետացումներ ենթադրելու լուրջ հիմքեր է ստեղծում։
Կարեւորելով ԿԽՄԿ-ի իրականացրած աշխատանքները` որպես չեզոք, անկողմնակալ կառույցի, որը 1992-ից գործունեություն է ծավալում Հայաստանում ու Արցախում, ԱԳ նախարարը շեշտել է ՀՀ-ում եւ Արցախում ԿԽՄԿ-ի առաքելության իրականացմանն աջակցել շարունակելու՝ հայկական կողմի պատրաստակամությունը:
Կարեւորվել է ԿԽՄԿ-ի գործունեության անհրաժեշտությունը ադրբեջանական ագրեսիայի հետեւանքով տուժած բնակչությանն օժանդակություն ցուցաբերելու համատեքստում, քանի որ ԿԽՄԿ-ն այս պահին Արցախում ներկա միակ միջազգային կառույցն է։
ԿԽՄԿ պատվիրակությունը պատրաստակամություն է հայտնել շարունակելու օժանդակությունը ՀՀ իշխանություններին՝ հետպատերազմյան իրավիճակում ստեղծված հումանիտար խնդիրները հաղթահարելու նպատակով: