Թուրքիայի նախագահ Ռեջեփ Թայիփ Էրդողանը հայտարարել է, որ ԱԳՆ-ին կարգադրել է անցանկալի անձ հայտարարել արդեն 4 տարի ազատազրկված թուրք իրավապաշտպան Օսման Կավալային ազատելու կոչ արած 10 երկրների դեսպաներին։
«Քնում-զարթնում, Կավալայի անունն են տալիս: Այդ Կավալա կոչվածը Սորոսի Թուրքիայի մասնաճյուղն է: Տասը դեսպան նրա համար գալիս են արտգործնախարարություն: Սա ինչ անքաղաքավարություն է: Նրանք պետք է ճանաչեն Թուրքիան, հասկանան եւ իմանան: Այն օրը, երբ չեն հասկանա Թուրքիան, կհեռանան»,- այսօր Էսքիշեհիր քաղաքում ասել է Էրդողանը։
Դիվանագիտական պրակտիկայով՝ «անցանկալի անձ» հայտարարված դիվանագետը պարտավոր է 24 ժամվա ընթացքում լքել երկրի տարածքը։
Թուրքիայի նախագահն օրերս էր սպառնացել արտաքսել նրանց։
Կանադայի, Ֆրանսիայի, Ֆինլանդիայի, Դանիայի, Գերմանիայի, Նիդերլանդների, Նոր Զելանդիայի, Նորվեգիայի, Շվեդիայի եւ ԱՄՆ դեսպանատներն ավելի վաղ Թուրքիային հորդորել էին ազատ արձակել Կավալային։ Դրանից հետո Թուրքիայի ԱԳՆ-ն կանչել էր այդ երկրների դեսպաններին եւ հիշեցրել դիվանագիտական հարաբերությունների մասին Վիեննայի կոնվենցիան պահպանելու անհրաժեշտության մասին։
Հասարակական, մշակութային գործիչ, հայտնի իրավապաշտպան, գործարար Օսման Կավալան Anadolu Kültür AŞ մշակութային հիմնադրամի հիմնադիրն է։ Հիմնադրամը մասնավորապես աջակցում է էթնիկ եւ կրոնական փոքրամասնություններին ուղղված նախագծերին, որոնք հաճախ միջազգային ուղղվածություն ունեն, այդ թվում թուրք եւ հայ բնակչության հաշտեցման եւ քրդական հարցի խաղաղ լուծման վերաբերյալ։
Թուրքիայի դատարանը 2020-ի փետրվարին Կավալային արդարացրել էր 2013-ին Ստամբուլի Գեզի այգում բողոքի ցույցերի մասին գործով կառավարությանը գահընկեց անելու փորձին առնչություն ունենալու մեղադրանքով, սակայն նույն օրը Ստամբուլի դատախազությունը նրա կալանավորման համար նոր օրդեր էր տվել։ Կավալային նոր մեղադրանքներ էին առաջադրվել 2016-ի հուլիսին Թուրքիայում պետական հեղաշրջման փորձին մասնակցելու համար։