Ադրբեջանի նախագահ Իլհամ Ալիեւն այսօր տիկնոջ՝ Ադրբեջանի առաջին փոխնախագահ Մեհրիբան Ալիեւայի ուղեկցությամբ այցելել է Արցախյան վերջին պատերազմից հետո Ադրբեջանի վերահսկողության տակ անցած Կուբաթլուի (Սանասար) շրջան։
Ըստ APA գործակալության՝ այցի ընթացքում Ադրբեջանի ղեկավարը մասնակցել է սահմանապահ զորքերի նոր զորամասի բացման, ինչպես նաեւ շրջկենտրոն Կուբաթլուն (Որոտանը) Խանլըղ (Իշխանաձոր) գյուղին կապող նոր ճանապարհի կառուցման մեկնարկի արարողություններին։
44-օրյա պատերազմի ընթացքում ադրբեջանական ուժերը Կուբաթլուն գրավել էին ուղիղ մեկ տարի առաջ՝ 2020-ի հոկտեմբերի 25-ին։
Նոր ճանապարհներ, նոր նախագծեր
Վաղն էլ Ալիեւը Թուրքիայի նախագահ Ռեջեփ Էրդողանի հետ կմասնակցի Ֆիզուլիի (Վարանդա) օդանավակայանի բացմանը։
Աֆրիկայի երկրներից Թուրքիա վերադառնալիս Էրդողանը ոչ միայն խոսել էր վաղը Ադրբեջան կատարելիք այցի մասին, այլև հերթական անգամ անդրադարձել էր այսպես կոչված «Զանգեզուրի միջանցքին»՝ հայտարարելով, թե Անկարան վճռական է տրամադրված այդ հարցում։
«Այս հարցերը քննարկել եմ իմ եղբայր Իլհամ Ալիեւի հետ, այցի շրջանակում կմասնակցենք Ֆիզուլիի օդանավակայանի եւ մի քանի բոլոր ճանապարհների բացմանը, ինչպես նաեւ կսկսենք նոր նախագծեր ագրարային ոլորտում։ «Զանգեզուրի միջանցքի» հարցում մեր վճռականությունն անփոփոխ է»,- ասել է Էրդողանը։
Թուրքիայի նախագահն Արցախյան վերջին պատերազմից հետո արդեն երկու անգամ այցելել է Ֆիզուլի։ Անցած տարվա դեկտեմբերին նա մասնակցել է հաղթանակի զորահանդեսին, իսկ հունիսին երկրորդ այցի շրջանակում Ադրբեջանն ու Թուրքիան ստորագրել են «Շուշիի հռչակագիրը»։