Թուրքիայի նախագահ Ռեջեփ Թայիփ Էրդողանը հայտնել է, որ Թուրքիան հաշվի չի առնում անազատության մեջ գտնվող իրավապաշտպան Օսման Կավալայի եւ ընդդիմադիր քաղաքական գործիչ Սելահաթին Դեմիրթաշի նկատմամբ ԵՄ-ում կայացված որոշումները։
Ավելի վաղ հրապարակվել էր ԵՄ արտաքին քաղաքականության ծառայության ներկայացուցչի հայտարարությունը, որում Եվրամիությունն Անկարային կոչ է անում անհապաղ ազատ արձակելու Կավալային եւ Դեմիրթաշին:
«Մենք չենք ճանաչում Կավալայի եւ Դեմիրթաշի նկատմամբ Եվրոպական միության ընդունած որոշումները։ Մենք համարում ենք, որ այդ որոշումները չկան»,- ընդգծել է Էրդողանը։
2016-ի նոյեմբերին թուրքական իշխանությունները ձերբակալել էին քրդամետ Ժողովուրդների դեմոկրատական կուսակցության 10 պատգամավորների, այդ թվում՝ Դեմիրթաշին եւ կուսակցության մեկ այլ համանախագահի՝ Ֆիգեն Յուքսեքդաղին։ Նրանց մեղադրում են Թուրքիայում արգելված` Քրդստանի աշխատավորական կուսակցության հետ կապերի համար։ Պատգամավորները հերքում են այդ մեղադրանքները։
Ինչ վերաբերում է Կավալային, ապա ավելի վաղ Ստամբուլի դատարանը պահպանել էր Թուրքիայի կառավարության տապալման փորձին մեղսակից լինելու մեղադրանքով ձերբակալված հայտնի իրավապաշտպանի խափանման միջոցը: Կավալան Anadolu Kültür AŞ մշակութային հիմնադրամի հիմնադիրն է, որը մասնավորապես աջակցում է էթնիկ եւ կրոնական փոքրամասնությունների նախագծերին, որոնք հաճախ միջազգային ուղղվածություն ունեն, այդ թվում՝ թուրք եւ հայ ազգերի հաշտեցումն ու քրդական հարցի խաղաղ լուծումը:
Թեեւ կառավարության տապալման փորձին մասնակից լինելու մեղադրանքով թուրքական դատարանն ավելի վաղ արդարացրել էր Կավալային, սակայն նույն օրը եւեթ Ստամբուլի դատախազությունը նրան կալանավորելու նոր հրաման էր տվել: Կավալային նոր մեղադրանքներ էին ներկայացվել, այս անգամ՝ Թուրքիայում 2016-ի հուլիսին տեղի ունեցած հեղաշրջման փորձին մասնակցելու համար։
Էրդողանը դեռ հոկտեմբերի վերջին սպառնացել է արտաքսել Թուրքիայում դիվանագիտական առաքելություն իրականացնող Միացյալ Նահանգների, Գերմանիայի, Դանիայի, Ֆինլանդիայի, Ֆրանսիայի, Նիդերլանդների, Շվեդիայի, Կանադայի, Նորվեգիայի եւ Նոր Զելանդիայի դեսպաններին՝ թուրք հասարակական գործիչ, իրավապաշտպան Օսման Կավալային աջակցող հայտարարության համար:
Ըստ Anadolu գործակալության՝ արեւմտյան մի շարք պետությունների՝ ԱՄՆ-ի, Կանադայի, Նիդերլանդների, Նոր Զելանդիայի, Շվեդիայի, Նորվեգիայի, Դանիայի եւ Ֆինլանդիայի` Անկարայում գործող դեսպանություններն այսօր հայտարարել են, որ պատրաստ են հետեւելու թուրքական օրենքների պահանջներին եւ չմիջամտելու Թուրքիայի ներքին գործերին։ 10 երկրների դեսպանություններից Ֆրանսիան ու Գերմանիան չեն միացել այդ հայտարարությանը։
Այս տարվա փետրվարին էլ ԱՄՆ Սենատի երկկուսակցական մեծամասնությունը նախագահ Ջո Բայդենի վարչակազմից պահանջել էր ճնշում գործադրել Թուրքիայի վրա, որպեսզի վերջինս ավելի հետեւողական լինի մարդու իրավունքների պաշտպանության հարցում:
ԱՄՆ կառավարությունը Թուրքիային կոչ էր արել անհապաղ ազատ արձակելու բարերար եւ իրավապաշտպան Օսման Կավալային: