Ըստ ՀՀ ԱԳՆ-ի՝ Անթալիայի դիվանագիտական ֆորումի շրջանակում ՀՀ ԱԳ նախարար Արարատ Միրզոյանը մարտի 10-ի երեկոյան հանդիպում է ունեցել ՌԴ ԱԳ նախարար Սերգեյ Լավրովի հետ։
Հանդիպման ընթացքում Արարատ Միրզոյանը եւ Սերգեյ Լավրովն անդրադարձել են հայ-ռուսական համագործակցության հարուստ օրակարգին, քննարկել դաշնակցային հարաբերությունների ամրապնդմանը վերաբերող հարցեր։ Զրուցակիցները գոհունակություն են հայտնել երկու երկրների միջեւ առկա քաղաքական երկխոսության մակարդակի, բարձր եւ բարձրագույն մակարդակներում շփումների ակտիվության կապակցությամբ։
Կողմերն անդրադարձել են 2020-ի նոյեմբերի 9/10-ի, 2021-ի հունվարի 11-ի եւ 2021-ի նոյեմբերի 26-ի եռակողմ հայատարարություններով ձեռք բերված պայմանավորվածությունների իրականացման ընթացքին, ինչպես նաեւ Հայաստան-Թուրքիա կարգավորման գործընթացին:
Կարեւորվել է ԵԱՀԿ Մինսկի խմբի համանախագահության մանդատի ներքո Լեռնային Ղարաբաղի հակամարտության համապարփակ եւ տեւական կարգավորման խաղաղ բանակցությունների լիարժեք վերսկսումը։
Միրզոյանը Լավրովին է ներկայացրել Լեռնային Ղարաբաղում եւ Հայաստան-Ադրբեջան սահմանագոտում ադրբեջանական կողմից հրադադարի ռեժիմի շարունակական խախտումների եւ սադրիչ գործողությունների հետեւանքով ստեղծված իրավիճակը՝ կարեւորելով լարվածության թուլացման եւ միջադեպերի կանխման ուղղությամբ անհրաժեշտ քայլերի իրականացումը։
Հայաստանի եւ Ռուսաստանի արտաքին քաղաքական գերատեսչությունների ղեկավարները հանգամանալից մտքեր են փոխանակել ՀԱՊԿ, ԵԱՏՄ, ԱՊՀ եւ միջազգային այլ հարթակներում փոխգործակցության սերտացման եւ արդյունավետության բարձրացման շուրջ: