Եվրամիության առաջնորդները ողջունել են Ուկրաինայի իրավիճակի առնչությամբ հետաքննություն սկսելու Միջազգային քրեական դատարանի որոշումը՝ հայտարարելով, որ պատերազմ սկսելու համար մեղավորները կպատժվեն:
Երկար քննարկումից հետո մարտի 10-ի գիշերն ընդունված հայտարարության մեջ ասվում է, որ Եվրամիությունը, չսպասելով Եվրահանձնաժողովի՝ ԵՄ-ին անդամակցության վերաբերյալ Ուկրաինայի պաշտոնական դիմումի քննարկման արդյունքներին, կամրապնդի կապերն Ուկրաինայի հետ:
Եվրոպական խորհրդի նախագահ Շառլ Միշելն էլ, թվիթերյան գրառման մեջ անդրադառնալով ԵՄ առաջնորդների հայտարարությանը, ասել է, որ ԵՄ-ն Ուկրաինային խոստանում է նաեւ քաղաքական, ֆինանսական, նյութական եւ հումանիտար աջակցություն՝ վստահեցնելով, որ ամբողջ ուժով կօգնի պատերազմից հետո ժողովրդավարական Ուկրաինայի վերականգնմանը։