Շվեյցարիայի զարգացման եւ համագործակցության գործակալությունը Հայաստանին 960000 շվեյցարական ֆրանկ (մոտ 1 մլն ԱՄՆ դոլար) է տրամադրելու ճգնաժամային վիճակում հայտնված սահմանամերձ համայնքների տնտեսական զարգացման նպատակով։ Ծրագրի մեկնարկից առաջ Երեւանում գործակցության պայմանագիր ստորագրեցին Հայաստանում Շվեյցարիայի դեսպան Լուկաս Ռոզենկրացը եւ ՄԱԿ—ի Պարենի համաշխարհային ծրագրի հայաստանյան գրասենյակի տնօրեն Նաննա Սկաուն։
«Հայաստանի սահմանամերձ համայնքների տոկունություն եւ տնտեսական վերականգնում (REBCA)» մարդասիրական ծրագիրը բարելավելու է Հայաստանում սահմանամերձ բնակավայրերում ապրող մարդկանց կյանքի որակը։
Ծրագիրը տնտեսական ռեսուրսներ կհատկացնի Վարդենիս, Սիսիան, Ջերմուկ խոշորացված համայնքների՝ Ադրբեջանի ռազմական գործողություններից տուժած 15 սահմանամերձ բնակավայրերի ավելի քան 1000 տնային տնտեսության։ Ծրագիրը կտրամադրի դրամական օգնություն, սոցիալական աշխատանքի աջակցություն, կօգնի գյուղատնտեսակական աշխատանքների հարցում՝ զարգացնելով բիզնես հմտությունները, կնպաստի՝ լուծելու զբաղվածության խնդիրը։ Աջակցություն կտրամադրվի նաեւ այն ֆերմերներին, որոնք իրենց տնտեսությունները վերսկսելու կարիք ունեն։
Ծրագրին կաջակցեն նաեւ ՀՀ աշխատանքի եւ սոցիալական հարցերի նախարարությունը, ՀՀ տարածքային կառավարման եւ ենթակառուցվածքների նախարարությունը եւ ընտրված թիրախային տարածաշրջանների տեղական իշխանությունները: Ծրագիրը կմեկնարկի հաջորդ շաբաթվանից՝ «Վորլդ Վիժն Հայաստան» (WVA) կազմակերպության, «Մանկական զարգացման հիմնադրամի» (CDF) եւ «Ռազմավարական զարգացման գործակալության» (SDA) ներգրավմամբ։
«Հայաստանի սահմանամերձ համայնքների տոկունություն եւ տնտեսական վերականգնում (REBCA)» շվեյցարական մարդասիրական ծրագիրը Հայաստանում երկարամյա ավանդույթ ունի, որ սկսվել է 1988 թվականի Սպիտակի երկրաշարժից հետո:
Հայաստանում Շվեյցարիայի արտակարգ եւ լիազոր դեսպան Լուկաս Ռոզենկրացը նշեց․ «Ռազմական էսկալացիաները ծանր խնդիրներ են առաջացրել Վայոց ձորի, Գեղարքունիքի, Սյունիքի մարզերում: Դրանց հետեւանքով 90 հազար մարդ բավականին ծանր վիճակում է․ տնտեսական եւ պարենային անվտանգության խնդիրներ կան, որոնք լուծման կարիք ունեն։ Այս ծրագիրն իրականացնում ենք ՄԱԿ-ի Պարենի համաշխարհային ծրագրի հետ՝ նպատակ ունենալով բարելավելու սահմանամերձ համայնքներում ապրող մարդկանց կյանքը»։
ՄԱԿ-ի Պարենի համաշխարհային ծրագրի հայաստանյան գրասենյակի տնօրեն Նաննա Սկաուն էլ ընդգծեց՝ Շվեյցարիայի զարգացման եւ համագործակցության գործակալությունը գյուղատնտեսական ծրագրեր իրագործելու հարուստ փորձ ունի, եւ դա շատ կարեւոր է ծրագրի արդյունավետ իրագործման համար։
«Համայնքներում մարդիկ զբաղվում են գյուղատնտեսական աշխատանքներով։ Մեր առաքելությունն է աջակցել նրանց, ձեւավորել բիզնես-հմտություններ, որպեսզի այդ մարդիկ միշտ ապահովված լինեն պարենով»,- նշեց Սկաուն։
ՄԱԿ-ի Պարենի համաշխարհային ծրագիրը ակտիվորեն համագործակցում է ՀՀ Կառավարության հետ։ Շահառու մարզերն ու համայնքները եւ պետք է ակտիվ լինեն, համագործակցեն ծրագրի կազմակերպիչների հետ, որպեսզի կարիքների արդյունավետ գնահատում կատարվի, եւ ծրագիրն ավելի հաջողված լինի։
«ՄԱԿ-ի Պարենի համաշխարհային ծրագիրը պայքարում է սովի դեմ, մենք ներդրում ենք անում սննդի արտադրական գործընթացներում։ Վստահ եմ, որ բնակչության համար կարեւոր է հմտություններ ձեռք բերել ու ժամանակի ընթացքում պարենի ապահովվածություն ունենալ»,– նշեց Նաննա Սկաուն։
«Ալիք Մեդիա»-ի հարցին՝ իսկ ՄԱԿ-ի Պարենի համաշխարհային ծրագիրը Գեղարքունիքի, Սյունիքի, Վայոց ձորի վերոնշյալ համայնքներից բացի աջակցության կարիք ունեցող մյուս համայնքներին այլ ծրագրերի շրջանակներում աջակցելո՞ւ է, Նաննա Սկաուն պատասխանեց․ «Այո՛, մենք արդեն իսկ որոշակի ծրագրեր իրականացնում ենք նաեւ մյուս մարզերում՝ պարենային անվտանգությունն ապահովելու նպատակով։ Օգնում ենք ջերմոցներ կառուցելու հարցում։ Շիրակում եւ Սյունիքում մեր աջակցությամբ արեւային կայաններ են տեղադրվել: Կշարունակենք ծրագրերը Հայաստանի բոլոր մարզերում»,- վստահեցրեց նա։
Լրագրողն իր մասնագիտական գործունեությամբ հասարակական կարծիք է ձեւավորում։ Հենց ա՛յդ գիտակցումով եմ առաջնորդվում եւ աշխատում։