Ըստ վրացական «Պիրվելի արխի» (Առաջին ալիք) հանրային հեռուստաալիքի՝ Վրաստանի արտգործնախարար Իլյա Դարչիաշլին Երեւանում հայտարարել է, որ հայ-վրացական սահմանի հատման պարզեցումը երկու երկրների քաղաքացիներին էլ ավելի կմերձեցնի եւ կամրապնդի միջանձնային փոխգործակցությունը։
Ավելի վաղ Երեւանում հայ-վրացական միջկառավարական հանձնաժողովի 12-րդ նիստի ժամանակ երկու երկրների վարչապետներ Նիկոլ Փաշինյանը եւ Իրակլի Ղարիբաշվիլին ստորագրել են համաձայնագիր, ըստ որի` երկու երկրների քաղաքացիները միջպետական սահմանը կարող են հատել էլեկտրոնային եղանակով։ «Հանձնաժողովը կարեւոր հարթակ է, որը մի կողմից հնարավորություն է տալիս գնահատելու երկրների միջեւ տնտեսական համագործակցությունը, ինչպես նաեւ ապագայի պլաններ նախանշելու փոխգործակցության ամրապնդման համար»,- ասել է Դարչիաշվիլին։ Ըստ նրա` հանձնաժողովներն օգնում են համապատասխան գերատեսչություններին էլ ավելի մեծ արդյունավետություն գրանցելու։
Փոխվարչապետ, էկոնոմիկայի եւ կայուն զարգացման նախարար Լեւան Դավիթաշվիլին իր հերթին մատնանշել է զբոսաշրջային հոսքի աճն ու դինամիկան։ Նա ընդգծել է այն հնարավորությունները, որ Վրաստանն ունի Եվրոպայից էլեկտրաէներգիայի տարանցման եւ վաճառքի առումով։