«ՀայՓոստը» ստացել է «Ծագող աստղ» բարձրագույն մրցանակ։ Մրցանակը շնորհվել է փոստային ինովացիոն լուծումների, ինչպես նաեւ հաճախորդամետ քաղաքականության համար:
Մրցանակը «ՀայՓոստը» ստացել է Սլովակիայի մայրաքաղաք Բրատիսլավայում անցկացվող «Փոստ Եվրոպա»-ի 2023 թվականի ընդհանուր ժողովում:
«ՀայՓոստ» ՓԲԸ գլխավոր գործադիր տնօրենի տեղակալ Արտակ Ղուլյանը, կարեւորելով ենթակառուցվածքների արդիականացումը՝ եվրոպական բոլոր ստանդարտներին համապատասխանելու համար, խոստացել է, որ ընկերությունը մշտապես հետեւողական կլինի Հայաստանում փոստի զարգացման գործում:
«Փոստ Եվրոպա»-ի գլխավոր քարտուղար Բոտոնդ Սզեբենին մրցանակը հանձնելիս ասել է, որ «ՀայՓոստը» վերջին մեկ տարում զգալի առաջընթաց է գրանցել թե՛ ծառայությունների հասանելիության եւ թե՛ էլեկտրոնային տվյալների փոխանցման ոլորտում: