100 տարեկանում մահացել է Հենրի Քիսինջերը

Հենրի Քիսինջերը ԱՄՆ 37-րդ նախագահ Ռիչարդ Նիքսոնի կառավարման տարիներին ազգային անվտանգության հարցերով խորհրդականն ու ԱՄՆ պետքարտուղարն էր։ ԱՄՆ նախագահ Ջերալդ Ֆորդի նախագահության տարիներին շարունակել է զբաղեցնել պետքարտուղարի պաշտոնը։ Լինելով իրական քաղաքականության կողմնակից՝ Հենրի Քիսինջերը 1969-1977 թվականներին որոշիչ դերակատարում է ունեցել Միացյալ Նահանգների արտաքին քաղաքականությունում։ Նախաձեռնել է միջազգային լարվածության լիցքաթափման քաղաքականությունը, որը հանգեցրել է ԱՄՆ-ԽՍՀՄ եւ ԱՄՆ-Չինաստան հարաբերություններում լարվածության զգալի նվազմանը։

ԱՄՆ նախկին պետքարտուղար Հենրի Քիսինջերը, մայիսին գերմանական Die Zeit շաբաթաթերթին տված հարցազրույցում անդրադառնալով ռուս-ուկրաինական հակամարտությանը, նշել էր, որ հենց ՆԱՏՕ-ին երկրի անդամակցության շուրջ քննարկումները հանգեցրին Ուկրաինայի պատերազմին։ Իրադարձությունների շարքը, որոնք հանգեցրին պատերազմին, ըստ ԱՄՆ նախկին պետքարտուղարի, սկսվեցին Ուկրաինային դաշինք ընդունելու հնարավորության մասին ՆԱՏՕ-ի անդամների առաջին քննարկումից հետո։ Քիսինջերն ասել է, որ թեեւ պատերազմն ինքնին շատ անողոք բան է, հարձակումը պետք է հետ մղվի, եւ ինքն աջակցում է ուկրաինական եւ արեւմտյան դիմադրությանը: Այդուհանդերձ, ըստ նրա, դրա ամբողջ մեղքը չպետք է բարդել միայն Պուտինի վրա:

Դեռ  մեկ ու կես տարի առաջ Հենրի Քիսինջերը հռչակվել էր Ուկրաինայի «թշնամի» եւ հայտնվել ուկրաինական «Խաղաղապահ» կայքի ցուցակում։ Մոսկվայի եւ Կիեւի միջեւ բանակցային գործընթացի վերսկսման անհրաժեշտության մասին Քիսինջերի հայտարարությունների պատճառով Ուկրաինան նրան մեղադրել է ռուսական քարոզչություն տարածելու hամար, ավելին՝ մեղսակից համարել Ուկրաինայի եւ նրա քաղաքացիների դեմ Ռուսաստանի իշխանությունների հանցագործություններին։