2013 թվականի մարտի 6-ին երգահան Ռուբեն Հախվերդյանը պարզաբանում է, թե ինչու է օրերս Սերժ Սարգսյանի մասին ասել «Ադրբեջանի հեռավոր գավառից եկած»: «Սերժ Սարգսյանը, որպես քաղաքական գործիչ, կայացել է Ադրբեջանում։ Կեւորկովի օրոք նա կոմսոմոլի քարտուղար էր, եւ հենց այդ ժամանակ հայաթափվեց Ղարաբաղը: Նա գավառամիտ է, լայնախոհ չէ: Նրա գալուց հետո քաղաքային մշակույթը գորշացավ»,- ասում է հայտնի երգահանը:
ՀՀԿ-ական ճարտարապետ Լեւոն Իգիթյանը լսել է, որ ինքը Երեւանում հասարակաց տուն է բացել: Ինքը հերքում է դա: «Եթե անգամ մի օր ունենամ, ապա դա կլինի «կիրթ» հասարակաց տուն, որտեղ կլինեն գեղեցիկ, արժեքավոր նկարներ, եւ դրանց կից կգործեն նաեւ հասարակաց տան ֆունկցիաները»,- պարզաբանում է պարոն Իգիթյանը:
ԱԺ փոխնախագահ Էդուարդ Շարմազանովը հիացած է իր մարգարեական շնորհքով: Նրա խոսքը գործ է դարձել ու այսօր էլ պնդում է. «Անկախ նրանից՝ ով ինչ պաշտոն է ուզում զբաղեցնի, առանց Մելիք-Ադամյան 2-ով անցնելու, այսինքն՝ առանց Հանրապետական կուսակցության կարծիքը հարցնելու՝ ծանրակշիռ կարծիքը, չի կարող հաջողություն ունենալ»:
ՀՀԿ խմբակցության պատգամավոր Մանվել Բադեյանը ոչ մի վատ բան չի տեսնում նրանում, որ Տարածքային կառավարման եւ արտակարգ իրավիճակների նախարարությունն իրարից բաժանում են, որ ՀՅԴ-ին նույնպես պաշտոն հասնի: «Ինչքան շատ են նախարարությունները, այնքան կոնկրետ են ոլորտները, օրինակ, ձիու, գորգի նախարարություն կա Թուրքմենիայում»,- ասում է Մանվել Բադեյանը:
Հայաստանում պրոպագանդիսատական հյուրախաղերի են ռուս լրագրողներ Դմիտրի Կիսելյովն ու Վլադիմիր Սոլովյովը: Նրանք եկել են մեզ բացատրելու մեր շահը: «Տեսեք, թե ինչպես է ձեզ հետ «աշխատում» Ամերիկան։ Ինչպես են փորձում ձեզ կտրել Ռուսաստանից։ Եվ նայեք այն երկրներին, որոնց արդեն կարողացել են անջատել Ռուսաստանից։ Դա ձեզ դուր է գալի՞ս»,- զգուշացնում է պարոն Սոլովյովը:
ՀՀԿ խմբակցության անդամ Տաճատ Վարդապետյանը Սերժ Սարգսյանին անփոխարինելի քաղաքական գործիչ չի համարում: «Նա անթերի քաղաքական գործիչ է»,- թեման փակում է ջավախահայ ՀՀԿ-ականը:
ՀՀ վարչապետ Նիկոլ Փաշինյանը ֆեյսբուքյան էջում կիսվում է իր կնոջ հոդվածով, որտեղ Աննա Հակոբյանը ներկայացնում է, թե դստեր հետ ինչ էր անում Բրյուսելում: «Արա էս ի՞նչ էր։ Սրանք ընտանիքով կերան երկրի բյուջեն։ Ուտել-պրծնելու վրա են: Հասե՜ք, փրկեք…»,- հոդվածը մեկնաբանում է Փաշինյանը։
Երեւանի մետրոպոլիտենում սահմանադրական փոփոխությունների օգտին քարոզչության ժամանակ ուղեւորներից երիտասարդ մի աղջիկ պատռում է իրեն մեկնած քարոզչական բուկլետն ու նետում վարչապետ Փաշինյանի ուղղությամբ: «Ես սա համարում եմ «Այո»-ի ամենամեծ քարոզչությունը, որովհետեւ այս երիտասարդ կնոջ անվտանգությանը ոչինչ չի սպառնում, նրան անզգույշ չեն քաշքշում մոտակա զուգարանում»,- տեղի ունեցածը մեկնաբանում է ՀՀ վարչապետը:
«Հայրենիքի փրկության շարժման» համակարգող Իշխան Սաղաթելյանը Գլխավոր շտաբի պետ Օնիկ Գասպարյանին, որին պաշտոնանկ անելու դիմումով վարչապետը դիմել է ՀՀ նախագահին, հորդորում է իր տեղում պինդ կանգնած մնալ. «Դա պաշտոնի կռիվ չէ: Դա բանակի պահպանության, մեր պետականությունը պահելու համար է, հետեւաբար, Օնիկ Գասպարյանը չպետք է ենթարկվի ապօրինի հրահանգների, մնա իր տեղում կանգնած՝ հանուն բանակի, հանուն Հայաստանի, հանուն Արցախի, հանուն մեր պետականության»:
Արցախի Արդարություն կուսակցությունը հայտարարություն է տարածում, որտեղ գնահատում է, թե ինչու են ռուս զինվորները հարձակվել Ուկրաինայի վրա: «Մենք կիսում ենք ՌԴ վարվող արտաքին քաղաքականությունը, քանի որ 2014-ի Մայդանից հետո Ղրիմում եւ Դոնբասում Ուկրաինայի իշխանությունները վարել են ռուս ազգաբնակչության հանդեպ էթնիկ զտման քաղաքականություն, եւ ՌԴ-ն ստիպված էր հատուկ գործողություններով իր հայրենակիցների անվտանգությունն ապահովել»,- բառացիորեն ասվում է հայտարարության մեջ:
Արցախի նախագահ Արայիկ Հարությունյանն Անվտանգության խորհրդում մանրամասներ է ներկայացրել ադրբեջանական կողմի հետ մարտի մեկին կայացած հանդիպումից։ «Ադրբեջանի ներկայացուցիչը փորձել է քննարկել քաղաքական թեմաներ՝ օգտագործելով ինտեգրացիա բառը, սակայն պարոն Շահրամանյանը (Ղարաբաղի կողմից հիմնական բանակցող ԱԽ քարտուղար Սամվել Շահրամանյանը-խմբ.) կանխել է՝ ասելով, որ եթե պետք է քննարկեն քաղաքական հարցեր, դա պետք է լինի Ադրբեջանի կողմից Արցախի անկախության ճանաչման թեման»,- ներկայացրել է Արցախի նախագահը: