Մոլդովայի տարածքում գտնվող Գագաուզիայի ինքնավար տարածքային միավորի ղեկավար Եվգենիա Գուցուլը, որը ձերբակալվել էր Քիշնեւի օդանավակայանում մարտի 25-ին, դիմել է Ռուսաստանի նախագահ Վլադիմիր Պուտինին եւ Թուրքիայի նախագահ Ռեջեփ Թայիփ Էրդողանին՝ խնդրելով ճնշում գործադրել մոլդովական իշխանությունների վրա՝ իրեն ազատելու նպատակով։
Գուցուլը փաստաբանների միջոցով տելեգրամյան ալիքում հրապարակված հայտարարության մեջ ՌԴ նախագահին «Գագաուզ ժողովրդի անունից» կոչ է անում կիրառել «դիվանագիտական, քաղաքական եւ իրավական բոլոր մեխանիզմները»՝ Մոլդովայի իշխանությունների վրա ճնշում գործադրելու եւ «քաղաքական ռեպրեսիաներն անհապաղ դադարեցնելու» համար։
Ինքնավար կազմավորման ղեկավարը աջակցություն է խնդրել նաեւ Թուրքիայի նախագահ Էրդողանից՝ հայտարարության մեջ նշելով, որ պաշտոնական Քիշնեւը Գագաուզիայի ժողովրդին ենթարկում է «քաղաքական եւ գաղափարական ճնշման» ու հետապնդում նրանց, ովքեր հանդես են գալիս «Թուրքիայի, Ռուսաստանի եւ այլ ռազմավարական գործընկերների հետ բարեկամության ու բարիդրացիական հարաբերությունների» օգտին։
Գուցուլը հույս է հայտնել, որ Էրդողանը «անտարբեր չի մնա»՝ նշելով, որ «հույս ունի նրա միջամտության վրա»։
Եվգենիա Գուցուլը ձերբակալվել է մարտի 25-ի երեկոյան Քիշնեւի օդանավակայանում՝ 72 ժամով, Կոռուպցիայի դեմ պայքարի ազգային կենտրոնի կողմից։ Նա պատրաստվում էր մեկնելու Ստամբուլ՝ Միջազգային լրագրողական կոնգրեսի հրավերով։
Այդ նույն օրը հակակոռուպցիոն դատախազությունը հայտարարել է, որ ավարտել է Գուցուլի եւ «Շոր» կուսակցության նախկին քարտուղարի դեմ ներկայացված մեղադրանքի ապացույցների ներկայացման գործընթացը։ Նրանց մեղադրում են կազմակերպված հանցավոր խմբի կազմում քաղաքական կուսակցության եւ ընտրություններին մասնակցած թեկնածուի ապօրինի ֆինանսավորմանը մասնակցելու համար։
Կրեմլը քննադատել է Մոլդովայի իշխանությունների գործողությունները՝ կապված Գուցուլի ձերբակալության հետ։
ՌԴ նախագահի խոսնակ Դմիտրի Պեսկովը հայտարարել է. «Մենք, իհարկե, դատապարտում ենք նման գործողությունները եւ կարծում ենք, որ Քիշնեւը պետք է հրաժարվի նման մեթոդներից ու ապահովի բոլոր քաղաքական ուժերի գործունեության ազատությունը երկրում»։