ժամանակն է ստորագրելու համաձայնագիրը եւ առաջ շարժվելու Հարավային Կովկասում խաղաղության հասնելու եւ տնտեսական հնարավորությունների բացման ուղղությամբ։ Այդ մասին հայտարարել է Հայաստանի արտգործնախարար Արարատ Միրզոյանը Ղազախստանի արտգործնախարար Մուրատ Նուրտլեուի հետ հանդիպմանը հաջորդած ասուլիսի ժամանակ:
«Ինչպես բազմիցս առիթ եմ ունեցել նշելու, Հայաստանի դիրքորոշումը հստակ է․ երկու պետությունների տարածքային ամբողջականության ճանաչում եւ սահմանազատման գործընթացի իրականացում Ալմա-Աթայի հռչակագրի դրույթների հիման վրա, ինչպես նաեւ տարածաշրջանային հաղորդակցության ուղիների բացում՝ առաջնորդվելով յուրաքանչյուր պետության ինքնիշխանության ու իրավազորության անվերապահ հարգման, ինչպես նաեւ հավասարության եւ փոխադարձության սկզբունքներով»,- ասել է Միրզոյանը:
ՀՀ ԱԳ նախարարը նաեւ հայտարարել է, որ համապարփակ կարգավորման համար կարեւոր է մարդասիրական հարցերի հասցեագրումը, այդ թվում՝ «անհայտ կորած անձանց ճակատագրերի պարզումը եւ ռազմագերիների ու պահվող քաղաքացիական անձանց ազատ արձակումը»։
Հիշեցնենք՝ մարտի 13-ին Երեւանն ու Բաքուն հայտարարեցին խաղաղության համաձայնագրի տեքստի համաձայնեցման շուրջ բանակցությունների ավարտի մասին։
Հայաստանից բազմիցս են հայտարարել, որ պատրաստ են ադրբեջանական կողմի հետ խորհրդակցություններ սկսելու համաձայնագրի ստորագրման ժամկետների եւ տեղի շուրջ։ Միեւնույն ժամանակ Բաքվից ադեն տարբեր մակարդակներով մի քանի հայտարարություն է հնչել համաձայնագրի ստորագրման նախապայմանների վերաբերյալ, որոնք ներառում են Հայաստանի Սահմանադրության փոփոխության եւ ԵԱՀԿ Մինսկի խմբի լուծարման պահանջներ։
Վերջին օրերին էլ Ադրբեջանի պաշտպանության նախարարությունն էր հայտարարություններ տարածել իբր սահմանագոտու արեւելյան եւ հարավարեւելյան հատվածներում Հայաստանի ԶՈՒ-ի կողմից հրադադարի ռեժիմի խախտումների եւ ադրբեջանական դիրքերի գնդակոծման վերաբերյալ, որոնք Երեւանը հերքել էր։