ԱՄՆ նախագահ Դոնալդ Թրամփը հայտարարել է, որ Ուկրաինայի նախագահ Վլադիմիր Զելենսկին ցանկանում է հրաժարվել հազվագյուտ հողային մետաղների վերաբերյալ գործարքից, որի համաձայն՝ դրանց արդյունահանման բացառիկ իրավունք պետք է ստանային ամերիկյան ընկերությունները։ Թրամփը զգուշացրել է, որ գործարքից հրաժարվելը հետեւանքներ կունենա:
«Նա փորձում է հրաժարվել հազվագյուտ հողային մետաղների մասին գործարքից եւ եթե դա անի, խնդիրներ կունենա։ Մեծ, շատ մեծ խնդիրներ»,- ասել է Թրամփը լրագրողների հետ զրույցում (մեջբերումը՝ Reuters-ից):
ԱՄՆ նախագահը նաեւ հավելել է, որ Զելենսկին ցանկանում է, որ «Ուկրաինան ՆԱՏՕ-ի անդամ դառնա։ Սակայն այն երբեք Հյուսիսատլանտյան դաշինքի անդամ չի դառնա: Նա [Զելենսկին] դա հասկանում է»:
Թրամփը, խոսելով բնական պաշարների վերաբերյալ գործարքի մասին, միայն նշել է Ուկրաինայում հազվագյուտ հողային մետաղները: Մինչդեռ մի քանի օր առաջ հայտնի դարձավ, որ ԱՄՆ-ը պատրաստել է ընդերքի մասին համաձայնագրի տարբերակ, որը ենթադրում է ամերիկյան ընկերությունների առաջնահերթ հասանելիություն Ուկրաինայի տարածքում առկա բոլոր հանքային պաշարներին։