Ֆրանսիական դատարանը Եվրամիության միջոցների յուրացման գործով մեղավոր է ճանաչել ծայրահեղ աջ «Ազգային միավորում» կուսակցության առաջնորդ Մարին Լը Պենին եւ Եվրոպական խորհրդարանի եւս ութ պատգամավորի, հայտնում է BFMTV-ն:
Դատարանը Լը Պենին դատապարտել է չորս տարվա ազատազրկման, որոնցից երկուսը՝ պայմանականորեն: Մյուս երկու տարիների վերաբերյալ դեռեւս հստակություն չկա՝ քաղաքական գործիչը դրանք կանցկացնի իրական բանտում, թե տնային կալանքի ներքո:
Բացի այդ՝ Լը Պենին հինգ տարով արգելվել է առաջադրվել պետական պաշտոնների համար: Սա նշանակում է, որ նա չի կարողանա մասնակցել 2027 թվականի նախագահական ընտրություններին եւ դրա քարոզարշավին:
Լը Պենին եւ նրա համախոհներին մեղադրում էին Եվրոպական խորհրդարանում խորհրդարանական օգնականների կեղծ ընդունելության մեջ՝ «Ազգային միավորման» օգտին գումարներ հափշտակելու համար: Հետաքննության վարկածով՝ մեղադրյալների գործողություններից ընդհանուր վնասը եղել է գրեթե երեք միլիոն եվրո:
Դատարանը գործը սկսել էր քննել նախորդ տարվա սեպտեմբերի վերջին: Մեղադրող կողմը Լը Պենի համար պահանջել էր հինգ տարվա ազատազրկում՝ պայմանական, հինգ տարով ընտրովի մարմիններում ընտրվելու իրավունքից զրկում եւ 300 հազար եվրո տուգանք:
Քաղաքական գործիչը հայտարարել էր 2027 թվականին նախագահի պաշտոնում առաջադրվելու մտադրության մասին: Ի պատասխան մեղադրանքների՝ նա ասել է, որ դատախազությունը ցանկանում է զրկել ֆրանսիացիներին այնպիսի թեկնածուների համար քվեարկելու հնարավորությունից, որոնց նրանք կցանկանային:
Մարին Լը Պենը «Ազգային միավորում» կուսակցության առաջնորդն էր 2011-ից մինչեւ 2021 թվականը:
Նա երեք անգամ եղել է Ֆրանսիայի նախագահի թեկնածու։