Կարեւոր է, որ Հայաստանն ու Ադրբեջանը հակամարտության լուծման եւ խաղաղություն հաստատելու համար կատարեն վերջին քայլերը։ Այդ մասին այսօր հայտարարել է Գերմանիայի Դաշնության նախագահ Ֆրանք Վալտեր-Շտայնմայերը Հայաստանի նախագահ Վահագն Խաչատուրյանի հետ հանդիպմանը հաջորդած համատեղ ասուլիսի ժամանակ։
«Խաղաղության համաձայնագրում այլեւս բաց հարցեր չկան, եւ այլեւս ոչինչ չի խանգարում, որ այն ստորագրվի, վավերացվի եւ իրագործվի։ Հայաստանը որոշումներ է կայացրել, որոնք հանգեցրել են խաղաղության համաձայնագրի հնարավոր դառնալուն, եւ այժմ Ադրբեջանում պետք է բոլոր հնարավոր թերահավատությունները վերացնել»,- ընդգծել է Գերմանիայի նախագահը։
Շտայնմայերն ընդգծել է, որ կողմերը պետք է օգտագործեն այս պատեհ ժամանակը, որպեսզի երկարաժամկետ եւ կայուն խաղաղություն հաստատվի Հարավային Կովկասում։
Գերմանիայի նախագահը նաեւ նշել է, որ թեեւ Հայաստանի համար «հեշտ չի եղել ավարտին հասցնել այս հակամարտությունը», այնուամենայնիվ շատ երկրներ պետք է «օրինակ վերցնեն գործընթացից»։
Հիշեցնենք՝ Շտայնմայերը Հայաստան է ժամանել մարտի 30-ին։ Այսօր նա այցելել է Ծիծեռնակաբերդ՝ հարգանքի տուրք մատուցելու Հայոց ցեղասպանության զոհերի հիշատակին։ Ապրիլի 2-ին Գերմանիայի նախագահը կուղեւորվի Բաքու։