Ռուսաստանի գլխավոր դատախազությունը դիմել է Գերագույն դատարան՝ խնդրելով կասեցնել 2021 թվականին Աֆղանստանում իշխանության եկած «Թալիբան» շարժման գործունեության արգելքը ՌԴ-ի տարածքում:
Գլխավոր դատախազության վարչական դիմումը Գերագույն դատարանը կքննի ապրիլի 17-ին, հայտնում է «Ինտերֆաքս»-ը: Նիստը կանցկացվի փակ ռեժիմով:
2024 թվականի դեկտեմբերին Պետդուման օրենք ընդունեց, որով թույլատրվում էր կառույցները բացառել ահաբեկչական կազմակերպությունների ցանկից: Այնուհետեւ այն ստորագրեց նախագահ Վլադիմիր Պուտինը: Օրենքի համաձայն՝ Ռուսաստանում ահաբեկչական ճանաչված կազմակերպության գործունեության արգելքը առաջարկվում է չեղարկել դատարանի որոշմամբ՝ գլխավոր դատախազի կամ նրա տեղակալի հայցի հիման վրա: Դատարանի որոշման համար պետք է լինեն «փաստական տվյալներ այն մասին, որ կազմակերպությունը ցանկանում է դադարեցնել ահաբեկչության քարոզչության, արդարացման եւ աջակցության ուղղությամբ գործունեությունը»:
Ռուսաստանի իշխանությունները վերջին տարիներին բազմիցս խոսել են «Թալիբան»-ը ահաբեկչական կազմակերպությունների ցանկից հանելու ծրագրերի մասին: Մասնավորապես, 2021 թվականի հոկտեմբերին՝ ԱՄՆ-ի՝ Աֆղանստանից դուրս գալուց եւ երկրում թալիբների կողմից իշխանությունը զավթելուց հետո, Ռուսաստանի նախագահ Վլադիմիր Պուտինը հայտարարեց, որ Մոսկվան մոտենում է «Թալիբան»-ը ահաբեկչական կազմակերպությունների ցանկից հանելու մասին որոշման ընդունմանը, սակայն դա առաջին հերթին պետք է անի ՄԱԿ-ի Անվտանգության խորհուրդը: Ռուսաստանի ԱԳՆ-ն հայտարարել էր, որ «Թալիբան»-ը ահաբեկչական կազմակերպությունների ցանկից հանելու հարցը մշակման փուլում է: