ԱՄՆ նախագահ Դոնալդ Թրամփը կարծում է, որ Ռուսաստանի իշխանությունները ձգձգում են Ուկրաինայի դեմ պատերազմի դադարեցման մասին բանակցությունները: Այդ մասին հայտնել է Fox News-ի լրագրող Ջեքի Հայնրիխը՝ հղում անելով քննարկումների ընթացքին ծանոթ աղբյուրին:
Հայնրիխի խոսքերով՝ Թրամփը հիասթափված է Ռուսաստանի նախագահ Վլադիմիր Պուտինից: Լրագրողը X սոցիալական ցանցում գրել է, որ Սպիտակ տանը քննարկում են պատժամիջոցների խստացված տարբերակները, որոնք կկարողանան հարվածել ռուսական ստվերային նավատորմին:
«Ինձ հայտնել են, որ ներկայում պատժամիջոցների պահպանման վերահսկողությունը ցածր է. ոչ պաշտոնապես այն գնահատվում է մոտավորապես «10-ից 3» մակարդակով: Եվ ռուսական «ստվերային նավատորմի» գործունեության խափանումը […] կարող է հեշտ թիրախ դառնալ ճնշում գործադրելու համար»,- գրել է Հայնրիխը:
Այն մասին, որ Թրամփը դժգոհ է Ռուսաստանի եւ Ուկրաինայի նախագահների վերջին հայտարարություններից, ավելի վաղ հայտնել էր նաեւ Սպիտակ տան մամուլի քարտուղարը՝ առանց հստակեցնելու, թե կոնկրետ որ հայտարարություններն են առաջացրել ԱՄՆ նախագահի դժգոհությունը:
Թրամփը ավելի վաղ հայտարարել էր, որ «զայրացած է» Ուկրաինայի համար արտաքին կառավարում սահմանելու անհրաժեշտության մասին ՌԴ նախագահ Վլադիմիր Պուտինի հայտարարություններից: ԱՄՆ նախագահը սպառնացել էր նավթի արտահանման համար երկրորդական մաքսատուրքեր սահմանել, եթե Մոսկվան մոտ ժամանակահատվածում չհամաձայնի հաշտություն կնքել:
Ռուսաստանի ԱԳՆ-ն իր հերթին հայտնել է, որ Մոսկվան լուրջ է վերաբերվում Վաշինգտոնի առաջարկներին Ուկրաինայի վերաբերյալ, սակայն չի կարող ընդունել դրանք «ինչպես կան»: Ռուսաստանի արտաքին քաղաքական գերատեսչության ղեկավարի տեղակալ Սերգեյ Ռյաբկովը նշել է, որ ամերիկյան դիրքորոշումը չի ենթադրում ռուս-ուկրաինական հակամարտության առաջնային պատճառների վերացում եւ Կիեւին կոչ չի անում «դադարեցնել պատերազմը»: