Խաղաղության պայմանագրի ստորագրման համար Բաքվի առաջարկած պայմաններին վերաբերյալ Երեւանը դեռեւս լուրջ արձագանքներ չի տվել։ Այդ մասին հայտարարել է Ադրբեջանի նախագահ Իլհամ Ալիեւը՝ Բաքու պաշտոնական այցով ժամանած Գերմանիայի նախագահ Ֆրանկ-Վալտեր Շտայնմայերի հետ համատեղ ասուլիսի ժամանակ։
«Այսօրվա դրությամբ խաղաղության պայմանագրի տեքստը լիովին համաձայնեցված է եւ բաղկացած է 17 պարբերությունից։ Ադրբեջանն այստեղ լրացուցիչ պայմաններ չի առաջադրում։ Մեր պայմանները Հայաստանին հայտնի են եւ նոր չեն։ Այս պայմանները մենք վաղուց ենք առաջ քաշում, բայց Հայաստանից դեռեւս որեւէ լուրջ արձագանք չենք ստացել»,- հայտարարել է Ալիեւը։
Նրա խոսքերով՝ Բաքվի առաջարկած պայմանները երկուսն են՝ Հայաստանի Սահմանադրության փոփոխություն եւ ԵԱՀԿ Մինսկի խմբի լուծարում։
«Հայաստանի Սահմանադրությունում հղում կա անկախության մասին ակտին: Այն Սահմանադրության բաղկացուցիչ մասն է: Իսկ այնտեղ կա դրույթ Ադրբեջանի օրինական, պատմական տարածքը Հայաստանին միացնելու մասին, ինչը համարվում է մեր նկատմամբ բաց տարածքային հավակնություն: Հետեւաբար այդ դրույթը Հայաստանի Սահմանադրությունից հանելը մեր օրինական պահանջն է»,- հայտարարել է Ալիեւը:
Ադրբեջանի նախագահի խոսքերով՝ այս երկու պայմանները կատարելուց հետո խաղաղության պայմանագրի ստորագրման համար որեւէ խոչընդոտ չի լինի:
«Ինչպես ասում են, գնդակը Հայաստանի դաշտում է: Եթե Հայաստանն իսկապես ցանկանում է ստորագրել խաղաղության պայմանագիր, նա պետք է ընդունի Ադրբեջանի այս երկու օրինական պայմանները»,- հավելել է Ալիեւը:
Հիշեցնենք՝ մարտի 13-ին Երեւանն ու Բաքուն հայտարարեցին խաղաղության համաձայնագրի տեքստի համաձայնեցման շուրջ բանակցությունների ավարտի մասին։
Երեւանը բազմիցս է հայտարարել է, որ պատրաստ է դիտարկելու ԵԱՀԿ Մինսկի խումբը լուծարելու առաջարկը, սակայն խաղաղության համաձայնագրի ստորագրումից հետո։
Ինչ վերաբերում է Սահմանադրության փոփոխությանը, հայկական կողմն ընդգծել է, որ սա Հայաստանի ներքին գործն է, եւ որ երկրի մայր օրենքում հարեւանների նկատմամբ տարածքային պահանջներ չկան։ Ընդհակառակը՝ այդ Ադրբեջանի Սահմանադրությունն է, որ հարեւանների նկատմամբ հավակնություններ է ներկայացնում, սակայն Երեւանը դա բանակցային գործընթացի մաս չի դարձնում, որովհետեւ խաղաղության համաձայնագրի դրույթներից մեկը ընդգծում է, որ դրա պայմանները չկատարելու համար կողմերը չեն կարող հողում կատարել ներքին օրենսդրությանը։