Հայաստանը դատապարտում է միջազգային անվտանգության խաթարումը, որը դրսեւորվել է Իսրայելի կողմից նախորդ շաբաթ Իրանի դեմ հարձակումներով։ Այս մասին ասվում է Հայաստանի արտգործնախարարության X-ի էջում հրապարակված գրառման մեջ։
«Հայաստանը դատապարտում է միջազգային անվտանգության խախտմանն ուղղված գործունեությունը, որն արտահայտվել է նաեւ անցած շաբաթ Իսլամական Հանրապետության դեմ իրականացված գործողություններում։ Մենք խորապես մտահոգված ենք ավելի լայն տարածաշրջանում տեղի ունեցող զարգացումներով։ Հուսով ենք, որ դիվանագիտությունը հնարավորություն կտա պաշտպանել միջազգային իրավունքը եւ կանխել հետագա անցանկալի զարգացումները»,- ասվում է գրառման մեջ։
Հիշեցնենք, որ ոկտեմբերի 26-ին Իսրայելի պաշտպանության բանակը հայտարարեց Իրանում տեղակայված ռազմական օբյեկտներին օդային հարվածներ հասցնելու մասին, որը, ըստ բանակի հաղորդագրության, իրականացվել է ի պատասխան «բազմաթիվ շարունակական հարձակումների»։ Իրանի հակաօդային պաշտպանության ուժերը հայտարարեցին, որ հարձակման ենթարկվել են Իլամ, Թեհրան եւ Խուզեստան նահանգներում տեղակայված ռազմական օբյեկտները, սակայն վնասը ունեցել է սահմանափակ բնույթ, իսկ երկրի հակաօդային պաշտպանության համակարգերը կարողացել են հաջողությամբ կասեցնել հիմնական հարվածը։ Ավելի ուշ Իրանի բանակն էլ տեղեկացրեց, որ հարվածների հետեւանքով զոհվել է առնվազն չորս իրանցի զինծառայող։
Հոկտեմբերի 1-ին էլ Իրանն էր զանգվածային հրթիռային հարվածներ հասցրել Իսրայելին՝ ի պատասխան ՀԱՄԱՍ եւ «Հեզբոլլահ» շարժումների, ինչպես նաեւ Իսլամական հեղափոխության պահապանների կորպուսի ղեկավար կազմի առանցքային անձանց սպանությունների։ Իսրայելի Գլխավոր շտաբը խոստացել էր պատասխան հարված հասցնել։ Իր հերթին Իրանի Իսլամական Հանրապետության գերագույն առաջնորդը նախազգուշացրել է, որ իր երկրի պատասխան հարվածները Իսրայելին, այդ դեպքում, կլինեն ավելի լայնամասշտաբ։