Թբիլիսի այցի ընթացքում Օրբանը ԵՄ-ն չի ներկայացնի․ Բորել

Հունգարիայի վարչապետ Վիկտոր Օրբանը 28-29-ին Թբիլիսի կատարելիք այցի ընթացքում ինչ էլ ասի, նա չի ներկայացնում Եվրամիությունը, իսպանական ռադիոյի հետ զրույցում ասել է ԵՄ արտաքին քաղաքականության եւ անվտանգության բարձրագույն հանձնակատար Ջոզեպ Բորելը:

«Օրբանն այսօր մեկնում է Վրաստան […], անկասկած, ցույց տալու իր աջակցությունը Վրաստանի կառավարությանը։ Ինչ էլ ասի Օրբանը Վրաստան այցի ժամանակ, նա չի ներկայացնում Եվրամիությունը»,- ասել է Բորելը։

Նույնն է ասել նաեւ Վրաստանում Գերմանիայի դեսպան Պիտեր Ֆիշերը։

Հունգարիայի վարչապետ Վիկտոր Օրբանը հոկտեմբերի 28-29-ը պաշտոնական այցով կժամանի Վրաստան։ Օրբանը շնորհավորել է Վրաստանի իշխող «Վրացական երազանք» կուսակցությանը ընտրություններում տարած հաղթանակի կապակցությամբ՝ մինչ պաշտոնական տվյալների հրապարակումը:

Այսպիսով, վրաստանյան չորս ընդդիմադիր ուժերը՝ «Վրաստանի համար» կուսակցությունը, «Կոալիցիա փոփոխությունների համար» միավորումը, «Միասնություն — Ազգային շարժում» կոալիցիան եւ «Ուժեղ Վրաստան» կոալիցիան, հրաժարվում են խորհրդարանական մանդատներից:

Հոկտեմբերի 26-ին կայացած խորհրդարանական ընտրությունների նախնական պաշտոնական արդյունքներով` առաջին տեղում է իշխող «Վրացական երազանք»-ը՝ 50 տոկոսից ավելի ձայներով։ 5 տոկոսի շեմը հաղթահարել են չորս ընդդիմադիր քաղաքական միավորումներ:

1. «Վրացական երազանք»՝ 53 931 տոկոս,
2. «Կոալիցիա փոփոխությունների համար»՝ 11,035 տոկոս,
3. «Միասնություն-Ազգային շարժում»՝ 10,167 տոկոս,
4. «Ուժեղ Վրաստան»՝ 8,81 տոկոս,
5. «Վրաստանի համար»՝ 7,768 տոկոս:

Ընդդիմադիր կուսակցություններն ու Վրաստանի նախագահը չեն ճանաչել խորհրդարանական ընտրությունների արդյունքները։ Սալոմե Զուրաբիշվիլին կոչ է արել հանրությանը հոկտեմբերի 28-ին հավաքվել խորհրդարանի մոտ՝ աշխարհին ցույց տալու համար, որ չեն ճանաչում ընտրությունների արդյունքները։

Հեղինակ` Նորայր Միսկարյան 

ԱԼԻՔ ՄԵԴԻԱ ՎՐԱՍՏԱՆ