Գրիգորյանն ու Մուստաֆաեւը հստակեցրել են, թե որ հատվածներից է սկսվելու հայ-ադրբեջանական սահմանների հերթական սահմանազատումը

Հայաստանի փոխվարչապետ Մհեր Գրիգորյանի եւ Ադրբեջանի փոխվարչապետ Շահին Մուստաֆաեւի նախագահությամբ հայ-ադրբեջանական սահմանին այսօր՝ հունվարի 16-ին, տեղի է ունեցել սահմանազատման հարցերով պետական հանձնաժողովների տասնմեկերորդ հանդիպումը։ Այդ մասին հայտնում է ՀՀ արտգործնախարարությունը։

Պաշտոնական հաղորդագրության համաձայն՝ հանդիպման ընթացքում կողմերը շարունակել են մտքերի փոխանակությունը սահմանազատման աշխատանքների հետագա իրականացման համար սահմանագծի հատվածների հերթականության հարցի շուրջ եւ «համաձայնության են եկել սկսել պետական ​​սահմանի սահմանազատման համալիր աշխատանքները հյուսիսային հատվածից՝ Հայաստանի, Ադրբեջանի եւ Վրաստանի սահմանների հատման կետից, եւ այնուհետեւ հարավային ուղղությամբ՝ հյուսիսից հարավ մինչեւ Հայաստանի եւ Ադրբեջանի սահմանը Իրանի Իսլամական Հանրապետության հետ»:

Նշվում է նաեւ, որ կողմերը քննարկել են սահմանազատման աշխատանքների իրականացման կարգի վերաբերյալ համապատասխան ուղեցույցների նախագծերը:

Պայմանավորվածություն է ձեռք բերվել աշխատանքային կարգով համաձայնեցնելու հաջորդ հանդիպման անցկացման ամսաթիվն ու վայրը: