Սթիվեն Հոքինգի մեդալի հանձնման արարողությունը STARMUS փառատոնի կարեւորագույն իրադարձություններից է։ Փառատոնի պաշտոնական բացման ժամանակ` SONIC UNIVERSE (թարգմանաբար՝ Երաժշտական տիեզերք) ավանդական համերգի ընթացքում, հայտարարվեցին 2022 թվականի դափնեկիրների անունները, որոնց թվում են Queen խմբի լեգենդար կիթառահար Բրայան Մեյը, պոետ եւ նատուրալիստ Դայան Աքերմանը եւ պրիմատոլոգ ու մարդաբան, NASA-ի հաղորդակցության բաժնի հիմնադիր Ջեյն Գուդոլը։
Նրանք պարգեւատրվել են հանրայնացման ուղղությամբ համաշխարհային ներդրում ունենալու համար։
«Այս տարիների ընթացքում փառատոնին մասնակցել ու մրցանակը ստացել են մեծագույն մարդիկ, որոնք Լուսնի վրա են քայլել, ու ես շատ զարմացա, երբ ինձ էլ առաջարկեցին։ Ինձ համար մեծագույն պատիվ է այս մրցանակը կիսել իմ հերոսների հետ ու այս հրաշալի երկու կանանց հետ, որոնք փոխում են աշխարհը»,- ասաց Բրայան Մեյը։
Նա նշեց նաեւ, որ երջանիկ է լինել Հայաստանում, քանի որ երազել է այստեղ գալու մասին դեռ 1988 թվականի երկրաշարժի օրերից, երբ այլ աշխարհահռչակ երաժիշտների հետ փորձել է ամեն ինչ անել աղետյալներին օգնելու համար։
«Հայաստանը հիանալի է, եւ ես անպայման կվերադառնամ, եթե այդքան երկար ապրեմ»,- կատակեց Մեյը։
Sonic Universe համերգային ծրագիրը մեկ բեմում Մարսի շուրջը միավորել էր Ռիք Վեյքմանի, Քրիս Հեդֆիլդի, Sons of Apollo խմբի, Սերժ Թանկյանի, Տիգրան Համասյանի, Անդրեյ Մակարեւիչի պես աշխարհահռչակ երաժիշտների, որոնց նվագակցեց Հայաստանի ազգային ֆիլհարմոնիկ նվագախումբը։
Հայաստանում գիտության եւ արվեստի փառատոնն անցկացվելու է «STARMUS VI. 50 տարի Մարսի վրա» խորագրով եւ նվիրված է լինելու Մարսի վրա «Մարս 3» տիեզերակայանի առաջին վայրէջքի 50-ամյակին:
«Մարս 3»-ը տեղափոխել է դեպի Կարմիր մոլորակ հայ մեծանուն ինժեներ Ալեքսանդր Քեմուրջյանի Prop-M ռոբոտը։
STARMUS աշխարհահռչակ փառատոնը կապված է Սթիվեն Հոքինգի, Բրայան Մեյի, Ալեքսեյ Լեոնովի եւ աշխարհահռչակ այլ հայտնի անունների հետ, անցկացվում է 2011 թվականից, միավորում գիտությունը, կրթությունը, արվեստն ու տեխնոլոգիաները։
STARMUS փառատոնը հիմնադրել են աստղաֆիզիկոս Գարիկ Իսրայելյանը եւ լեգենդար Queen խմբի կիթառահար, աստղաֆիզիկոս Բրայան Մեյը։ Այն դարձել է համաշխարհային ճանաչում ունեցող գիտնականների, նոբելյան մրցանակակիրների, տիեզերագնացների, մտածողների, գիտության, մշակույթի եւ արվեստի գործիչների միավորող հարթակ, որի շրջանակում նրանք հանրության հետ կիսվում են իրենց գիտելիքներով, փորձով ու նորագույն հայտնագործություններով։ Նրանց միավորումը մեկ հարթակի շուրջ հնարավոր է դարձնում մեր ժամանակների խնդիրների վերհանումն ու լուծումների շուրջ քննարկումները։
Անժելա Ալեքյան